SALUTARO
Novjara Mesagho al Aziaj Esperantistoj, 2002
Renato Corsetti,
Prezidanto de Universala Esperanto-Asocio
Karaj aziaj esperantistoj, estas por mi granda honoro sendi al
vi novjaran mesaghon. Tio ne estu konsiderata la kutima komenca
frazo de tiaj mesaghoj, sed ghi estu lauvorte komprenata.
Fakte vi estas la nunaj reprezentantoj de longa kaj glora tradicio,
kiu de la komenco de la 20-a jarcento vidis multajn elstarajn
esperantistojn batali por interpopola interkomprenigho pere de
Esperanto en la plej malfacilaj situacioj kaj ofte je la kosto de
la vivo mem. Ni, nuntempuloj, povas nur rigardi al ili kun profunda
respekto kaj klopodi fari nian eblon por esti indaj je ili. Mi ne
volas doni nomojn, sed chiu el vi konas la pionirojn en sia lando.
Estas nia tasko porti la movadon por Esperanto en la trian
jarmilon. La Esperanto-movado dum la lastaj jardekoj iom similis
al popolo vaganta en la dezerto sen klara indiko pri la celo de la
vojagho. Kaj tamen la celo, "al kiu kuraghe ni iras"(*1), estis klara
jam de la komencaj poemoj de Zamenhof, kiun chiu komencanto lernas.
"Al la mondo, eterne militanta ghi promesas sanktan harmonion"(*2),
diras nia himno. Fakte nia tasko estas porti al la mondo pacon pere
de interkomprenigho. Por fari tion ni devas simple informi pri
Esperanto, instrui Esperanton kaj igi la homojn utiligi Esperanton.
La nova labor-plano de UEA(*3)
havas ghuste tiujn prioritatojn:
informado, instruado, utiligado. Mi kredas, ke se la aziaj esperantistoj
agos lau tiu labor-plano, la azia movado baldau havos shancojn ech
superi la europan movadon, char en Azio la malfermiteco al novaj
ideoj kaj la deziro je dialogo kaj paco estas esence pli grandaj ol
en aliaj mondo-partoj.
Informado signifas esence informadon pri Esperanto ankau en la
bedaurinde ankorau multaj aziaj landoj, en kiuj la movado estas en
la komenca stadio au ech ne en tiu.
Instruado signifas esence utiligon de chiuj modernaj rimedoj,
interalie de la retaj rimedoj, por lernigi Esperanton al chiam pli da
homoj. Kiel mi kutimas diri: "ne ekzistas Esperanto sen esperantistoj".
Ne fidu nur je la promesoj de politikistoj kaj famaj homoj, kiuj
bushe aprobas nian mesaghon. Nur tiuj, kiuj efektive lernas
Esperanton, plulaboros por ghi.
Utiligado estas tre vasta kampo, sed ghuste danke al ghi
Esperanto ighas chiam pli normala lingvo. Kiam Esperanto
estos utiligebla por vendi en Malajzio chinajn biciklojn au por
lerni en Japanujo pri kelkaj fakoj, tiam Esperanto estos pli normala
afero, ol ghi estas nun.
Kiel atingi tion? Karaj aziaj esperantistoj, mi mensogus al vi,
se mi dirus: "Jen, ekzistas UEA, kiu havas amason da mono. Petu,
kaj vi ricevos". Jes, ekzistas la Universala Esperanto-Asocio, sed
ghi havas ne monon sed homojn. Tiuj homoj, en chi tiu kazo,
estas vi. Vi mem estos la chefaj motoroj de Esperanto tra Azio.
Organizighu ankorau pli firme malantau la Komisiono por Azia
Esperanto-Movado, KAEM, kaj ofertu kaj petu helpon al/c^e ghi.
Ghi jam atingis konsiderindajn sukcesojn en la pasintaj jaroj.
Ghi sukcesas chiujare ligi al UEA multajn aziajn izolitajn
esperantistojn. Ghi aranghas la aziajn kongresojn, kiuj estas unu
el fierindajhoj de la nuna azia movado. Ghi certe transiros al
rekta disvastigado de Esperanto en la landoj sen esperantistoj.
Ghi certe organizighos por ke chies okuloj turnighu al Azio
mem kaj ne daure al Roterdamo, kiam oni bezonas ion.
Ghis nun mi parolis pri agado che la bazo, pri "produktado"
de esperantistoj, char tio estas la esenca laboro, lau mi. Sed ni ne
devas forgesi, ke aziaj esperantistoj havas ankau gloran tradicion
de agado che la pinto, tio estas de agado pere de siaj registaroj
por influi internaciajn organizaghojn. Se iam vivis iu, kiu plej
proksime sukcesis porti la Esperanto-movadon al ghenerala
rekono, tio estas s-ro Nitobe (*4),
kiu agis en la Ligo de Nacioj.
Ankorau nun aziaj registaroj povus fari multon che Unuighintaj
Nacioj, se ili estus instigitaj de la landaj esperantistoj. Bonvolu
sekvi chi-rilate la petojn, kiujn vi ricevos de KAEM kaj UEA.
Fine, permesu al mi tushi alian punkton. Azio estas kontinento
kulture tre richa. En ghi ekzistas tre malsamaj civilizoj. Konigi
tiujn civilizojn al la ekstera mondo ankau estas via tasko. Ne timu.
Vi havas multon por doni, vi havas multon por komprenigi al la
mondo. Prezentu tion en Esperanto, kaj tiel Esperanto ighos vera
lingvo de dialogo inter civilizoj. Japanoj, chinoj, koreoj kaj
vjetnamoj jam havas tradiciajn spertojn pri tio. Surbaze de tiuj
spertoj povus ekagi ankau chiuj aliaj azianoj de okcidenta kaj
meza Azio.
Kiam oni petos la prezidanton de UEA verki novjaran
mesaghon okaze de la china nova jaro au okaze de la irana nova
jaro, tiam parto de niaj celoj estos jam atingita, char tio signifos
ke la mondo estos esence pli plur-centra ol ghi emas ighi nun.
La jaro 2002-a estu la jaro de eklaboro por pli forta azia
Esperanto-movado! Multajn bondezirojn al vi unuope kaj kune!
Renato Corsetti:
Italujo renato.corsetti@esperanto.org
NOTOJ provizitaj de la redaktoro de TTT-pagho
(*1) el ' La vojo' de L.L.Zamenhof; la plena teksto chi tie
(*2) el 'La espero' de L.L.Zamenhof; la plena teksto chi tie
(*3) la plena teksto
chi tie
(*4) NITOBE Inazo (1862-1933), japano.
Portreto en japanlingva retpagho, el la Muzeo pri Nitobe.